علي زمور: الشرعيه المسمومه

الى كل المدافعين عن شرعية الصناديق وان عادوا عدت

خوذوا الشرعيه
وارحلوا خلونا
يا وجوه نفرتونا
في الحر ما نفعتونا
في القر ما نفعتونا
بعد العراء والجوع
جوعتونا
خوذوا الشرعيه نسونا
تجار باسم الدين
غلطتونا
1
خوذوا الشرعيه انزاحوا
على صدر شعبي ريحوا وارتاحوا
روائح قذاره من الكراسي فاحت
المجلس تعفن الكل عفنتونا
واحنا مغيب العشق واحنا صباحو
يوم الغضب ما تقدروا تردونا
2
خوذوا الشرعيه معاكم
سقط القناع وسنين جربناكم
عمئ البصائر والطمع اعماكم
خنتوا الامانه “لقطر “بعتونا
ولوكان نزيدوا عام نستناكم
في موسم التفريخ تغتصبونا
3
مبروك ها الشرعيه
ودستور صاغه “خضر “في السريه
فصوله غريبه تافهه غيبيه
ثمه فصول أنا فهمتها تسبونا
وثمه فصول تصادر الحريه
والاعلام والقضاء لو سندونا
4
أما شرعيه قولوا
وانتم خربتوا الوطن عرضو وطولو
وما خص كان على الجياع تبولوا
يا اللي شربتوا البحر وعطشتونا
احنا عزمنا مجلس خراب نمشولو
وخلي “الدواعش “للحسم ينتظرونا
5
احنا عزمنا نجيكم.
يا زارعين الموت في فتاويكم
أكيد دم “الحاج “في رقابيكم
قتلتوه صائم ياكلاب وشويتونا
وللثار احنا نهدها كراسيكم
يا اللي عرفتوا الله وكفرتونا
,6
للثار احنا جينا
مازال “شكري “للملحمه ينادينا
ومازال صوته نسمعه يوصينا :
“اعداء الشعوب محال ما يحبونا
هوما فصيله بارهابهم تبلينا
ولو يقدرو على قتلنا …قتلونا
7
في الذاكرة سليانه
وبوليس لعريض وفرقته الجبانه
يوم الانذال يتهجموا على نسانا
وتهربوا من العنف واتهمونا
وظهرت كتائب طبعها الخيانه
برش البنادق على العيون عمونا
8
التهديد ما يخوفنا
كل الشوارع الغاضبه تعرفنا
وتاريخنا صنعناه ويشرفنا
يا اللي نسيتوا المجد وهددتونا
مهما يكون الجرح ومهما نزفنا
ثوار احنا في المعركه تلقونا
9
(ماناش من اللي يذلوا
وماناش من اللي وسط الثنيه يولوا )
وماناش من اللي يسرقوا ويصلوا
وماناش من اللي سمسروا ورهنونا
وما ناش من اللي يتعبوا ويكلوا
احرار احنا لعشق ألوطن ربونا

علي زمور